[英超]Big4入直路 曼聯放甩

英超Big4激戰周日結束，曼聯成為大贏家，大勝死敵利物浦三比○後，衛冕前途一片光明！賽後「紅魔鬼」主帥費格遜寸爆嫌贏得少，指隊中「2R」朗尼同C朗應各自連中三元，非常招積！曼聯贏波後掟甩次席球隊車路士五分，下月廿六日作客車路士，勢將成今季英超錦標生死戰！

Man Utd	31g	73p
Chelsea	31g	68p
Arsenal	31g	67p
Liverpool	31g	59p

雙紅會3:0破利物浦

前晚「雙紅會」曼聯輕鬆大炒利物浦，賽後主帥費格遜嫌贏波都唔夠開心，仲要寸爆對手，向傳媒表示今場算贏得少：「C朗應該可以上演帽子戲法，有兩次單對單面對龍門射唔入，咁遲先KO對手真係有皷失望。」費Sir話贏三粒已經算少，因為朗尼都有機會連中三元，但能夠以呢個比數贏波已經收貨。事實上，「紅軍」防線今場散晒，加上馬斯真蘭奴用粗口鬧球證被逐打少個，如非門將連拿救出六次單對單射門，肯定輸得更難睇。


拋離車仔五分

「紅魔鬼」全取三分後，現時拋離次席車路士五分，同第三位阿仙奴則有六分距離，領先優勢明顯，衛冕英超機會大增，於馬會奪標賠率亦熱至只得1.22倍。睇番餘下七周賽程，曼聯仲有兩場硬仗，下月十二日會主場對阿仙奴，廿六日就作客車路士，兩場賽事勝負將直接影響今季英超盟主誰屬，以球隊目前氣勢，情況相當樂觀。

車路士成功反勝殺上第二，射手杜奧巴向「紅魔鬼」發出警告，表示球隊正全力踩油力爭英超錦標，不過，車路士箧緊仲要作客兩隊硬禝曼城同愛華頓，加上仲要惡戰曼聯，亦唔易應付。至於阿仙奴，連歐聯在內，下月二日至八日將三戰利物浦，球隊今季食粥食飯，就睇呢三仗賽果。