[英格蘭]樸茨茅夫奪英格蘭足總盃

簡奴射死卡迪夫城
樸茅捧足總盃

樸茨茅夫勇奪英格蘭足總盃！
英足盃上演十七年來首次冇「Big4」球隊
參與決賽，結果樸茨茅夫憑簡奴一箭定江山，
以一比○擊敗英冠球隊卡迪夫城，
繼一九三九年以來，第二度捧走足總盃，
並取得來季足協盃入場券，
「樸茅」一班老將成功標尾會，可謂飲得杯落！

樸茨茅夫雖然賽前被睇高一線，但老謀深算領隊夏利列納並唔急於進攻，今仗排出穩陣「四五一」陣式，屯重兵於中場，前線僅留簡奴一人攻堅，希望以穩守突擊戰術，令卡迪夫城措手不及。

實現進軍歐洲夢

樸茅呢招果然奏效，三十七分鐘，藉對方門將安格文犯錯，由老將簡奴門前執雞，射成一比○，落後砼卡迪夫城傾力反撲，但完場前卻不幸食詐胡，樸茅半場領先一球。


換邊後，樸茅縮窄防線，令攻力欠銳卡迪夫城無從入手，及後更換入防守中場柏巴迪奧普，結果成功守住一比○勝果完場。


樸茅奪標，一班老將功不可沒，正選陣容之中，占士、蘇甘保、迪斯甸、靴達臣及簡奴都年過三十，但決賽依然表現出色，憑豐富經驗帶領球隊捧盃，終實現班主沙赫蓋達馬克進軍歐洲美夢。